Pita Istòria de la Cerva d'Oc (mai d'autras cervesas)
La cervesa es segurament un daus produchs umans los mai vielhs,
e trobem daus ressons de sa fabricacion en Mesopotamia (6000 av. J.C)
puei en Egipta. Estranhament, lo biais de la far a pas beucòp chamnhat dempuei...
"Monument Blau" Ofrenda de cervesa a la divessa Nin-Harra.
Faudrà mai esperar per veire enfin las prumieras cervesas fachas sus lo territòri
de l'Euròpa Occidentala, que los Romans, ilhs, aimavan mielhs lo vin,
bevenda plan mai "nauta" e plan mai aisada de far venir dins lo Sud de la França.
Autres còps, en Lemosin, lo monde fasian pas bien d'estat de la bierra, s'en bevia gaire e
beucòp beginhavan per lampar quela liquossiana rossa que brimava.
Per dire vrai, aimavan mielhs tiflar de lur citre o ben tot tirar lu vin a l'òrle de la barrica,
mai quitament far petar los uelhs dins la coada...
| Mas los temps an chamnhat, e quo es en 1760 qu'enfin un braçaire openhat, Peire Rabi, farjet la braçaria de la Jordania, que venguet mai tard la famosa braçaria Bertrand Mapataud (barrada en 1975). |
 |
 |
D'autres primadiers de la cervesa l'an seguit, coma las braçarias Holderer de St Iries. |
Uei lo temps daus grands establiments es plan chabat, e son la pitas braçarias,
totjorn mai nombrosas, que contunhen, per los lemosins bicanards o ben tot vilauds
que beurian pus mas de 'quò.
Entau donc la Braçaria de la Cerva d'Oc tròba sa plaça
dins queu Parc Naturau Regionau Peiregòrd-Lemosin ente s'es establida.
Guy PARAUD, lo mestre dau luec, braça per v'autres de la bierras coma las sap far :
blondas, ambradas, aromatisadas, blanchas... Que la Cerva d'Oc vos abeure !
Fabricacion de la Cerva d'Oc
La Fabricacion de la Cerva d'Oc fòrça nòstre braçaire a se levar d'abora. La prumiera estapa, quo es juste de botar l'aiga a chaufar.
|
 |
||
|
Dau temps que l'aiga chaufa, lo braçaire n'en profita per far son boiradis de grun. Fau pesar lo(s) malt(s), e boirar daus gruns segon çò que volem far. Per exemple, 'na bierra blancha sira compausada nonmas de blat, mas una ambrada podra se far emb mai de 4 òrtges diferents ! |
||
Apres aver concassat tot nòstre grun, queu- qui es botat dins l'aiga bulhenta e l'i vai demorar pendent doas oras. Quo es lo moment de botar en marcha lo boirador.
|
 |
||
|
Vai faler filtrar, puei que nòstre empatatge es 'chabat. Çò que demòra, e que 'pelem las drechas, vai demorar dins lo cruveu e nòstre most sira mes a bulhir enquera un còp emb l'auberon.
|
||
Un còp bulhida, nòstra Cerva d'Oc es refregida e enlevadurada.
|
 |
||
|
 |
Un còp los fusts plens, nòstre braçaire los bòta dins 'na chambra pro chaufada per que las levaduras se desvelopen e transformen lo sucre en alcòl.
|
|
Apres la fermentacion, la Cerva d'Oc dintra en garda, au fresche, per s'afinar e se descantar.
|
 |
||
|
 |
Enfin ven lo temps de la mesa en botelha, lo capsulatge... Coneissetz la sega !
|
|
Podetza tornar trapar la fabricacion de la Cerva d'Oc en bendas dessenhadas e en videò dins
la partida Besonhas dau site !
